భండారు శ్రీనివాస రావు – వార్తా వ్యాఖ్య: అయాం ఎ బిగ్ జీరో (166)

23, మే 2025, శుక్రవారం

అయాం ఎ బిగ్ జీరో (166) – భండారు శ్రీనివాసరావు

“ఇన్ సైడ్ వాయిస్! అవుట్ సైడ్ వాయిస్!”

నిజం చెప్పొద్దూ! నేను ఇంతవరకు వినని మాట. మా రెండో అన్నయ్య మనుమరాళ్లు స్పురిత, హసిత నోటి వెంట మొదటిసారి విన్నాను.

“టీవీ చర్చల్లో పాల్గొనేవాళ్లు దగ్గర దగ్గరగానే కూర్చొంటారు కదా! తాతయ్యా! మరి ఎందుకు అంత గట్టిగా అరుస్తున్నట్టు మాట్లాడతారు”

ఒకప్పుడు ఈ చర్చల్లో పాల్గొనేవాడిని కాబట్టి వారి ప్రశ్న ఒకరకంగా సూటిగా నాకే తగిలిన భావన కలిగింది.

నా నుంచి జవాబు రాకపోవడంతో వాళ్ళే మళ్ళీ అన్నారు, “ఈ డిబేట్స్ లో ఇన్ సైడ్ వాయిస్ చాలు, అనవసరంగా అవుట్ సైడ్ వాయిస్ తో మాట్లాడుతున్నారు” అని.

ఈ ఇద్దరూ అమెరికాలోనే పుట్టారు. కానీ మన చదువులకోసం, సాంప్రదాయకంగా వారిని పెంచడం కోసం పిల్లల్ని తీసుకుని మా అన్నయ్య కొడుకు లాల్, కోడలు దీప ఆ దేశం నుంచి వచ్చేసి హైదరాబాదులో సెటిల్ అయ్యారు. హైదరాబాదులో ఒకటి రెండు మూడు అని పెద్ద గొంతుకతో గావుకేకలు పెట్టే ప్రకటనలు ఇచ్చే పెద్ద కార్పొరేట్ కాలేజీలో ఖరీదైన ఫీజులు కట్టి చేర్పించారు. చేరిన మొదటి రోజే వారికి కళాశాల మెట్ల దగ్గర చెత్త కుప్పలు కనిపించాయి. ఏడాదికి ఒకసారయినా క్లీన్ చేస్తున్నట్టు లేదని వాళ్ళు మొహం చిట్లించారు. ( వీరిద్దరిలో పెద్డది స్పురిత ఇప్పుడు అమెరికాలో ఉద్యోగం చేస్తోంది. చిన్నది హసిత అదే దేశంలో పై చదువులు చదువుతోంది)

ఆ దేశంలో ప్రతివారికీ చిన్నప్పటి నుంచీ నలుగురిలో మాట్లాడడం ఎలాగో నేర్పుతారట. అందులో భాగమే ఈ ఇన్ సైడ్ వాయిస్, అవుట్ సైడ్ వాయిస్.

ఫుట్ బాల్ మైదానం పెద్దగా వుంటుంది. అక్కడ క్రీడాకారులు ఒకరితో మరొకరు స్వరం పెంచి మాట్లాడుకోవాల్సిన అవసరం వుంటుంది. అది అవుట్ సైడ్ వాయిస్. అటువంటి చోట్ల కొంచెం గొంతు పెంచినా ఎవరూ ఏమీ అనుకోరు.

అదే ఇళ్ళల్లో, స్కూళ్ళల్లో, మాల్స్ లో మాట్లాడుకొనేటప్పుడు స్వరం తగ్గించి మెల్లగా మాట్లాడడం అలవాటు చేస్తారు. అది ఇన్ సైడ్ వాయిస్ అన్నమాట.

గురువు అనేవాడికి వయసు ప్రధానం కాదు, జ్ఞానం ముఖ్యం. అది కలిగి వున్నవారు చిన్నవారయినా, మంచి విషయాలను వారి నుంచి నేర్చుకోవచ్చు.

ఆ విధంగా నేను, స్పురిత, హసితల నుంచి ఒక పాఠం నేర్చుకున్నాను.

అదే స్పురిత గ్రాడ్యు యేషన్ సెరిమనీ లో పాల్గొనడం ఈ సారి అమెరికా ట్రిప్ లో ప్రధాన అంశం.

అమెరికన్ విద్య వ్యవస్థలో ఈ కార్యక్రమాలకి అంత్యంత విలువ ఇస్తారు. తలితండ్రులు, కుటుంబసభ్యులే కాదు, స్నేహితులు కూడా పెద్ద సంఖ్యలో హాజరవుతారు. మేము పదిహేడు మందిమి కట్టగట్టుకుని విమానంలో తాంపా వెళ్ళింది స్పురిత గ్రాడ్యుయేట్ పట్టా తీసుకునే దృశ్యం చూడడం కోసమే.

స్పురిత చదువుకున్న సౌత్ ఫ్లోరిడా యూనివర్సిటీ చాలా గొప్పగా వుంది. ఎకరాలకు ఎకరాల ఆవరణలో విశాలమైన రోడ్లు. ఇరుపక్కలా పచ్చటి చెట్లు, అందమైన హాస్టల్ భవనాలు, తరగతి గదులు, గ్రంథాలయాలు, ఫీజు సంగతి ఏమో కానీ చదువుకుంటే ఇలాంటి చోట చదువుకోవాలి అని అసూయపడేలా వుంది.

సెరిమనీ జరిగిన సభామందిరం పరమాద్బుతంగా వుంది. అంతమంది జనం ఎలాంటి తొక్కిడి లేకుండా లోపలకు వెళ్లి రావడానికి చక్కటి ఏర్పాట్లు చేశారు. పట్టాలు తీసుకునే వాళ్ళు ఒకే రకం వస్త్ర ధారణతో వచ్చారు. ఈ దుస్తులను, నెత్తికి పెట్టుకునే టోపీని వాళ్ళు ఒక జ్ఞాపికగా దాచుకుంటారు.

కార్యక్రమం పూర్తయిన తర్వాత స్పురితను అభినందించి యూనివర్సిటీ ఆవరణ అంతా కలయతిరిగాము. కొలన్లు, సెలయేళ్ళు, నిలువెత్తు శిల్పాలతో పెద్ద ఉద్యానవనంలా వుంది.

మర్నాడు సంభవించిన భయంకరమైన సునామీని తప్పించుకుని మిగిలినవాళ్ళు తిరుగు ప్రయాణం అయ్యారు. నేనూ, సందీప్ అదే రోజు వేరే విమానంలో సియాటిల్ బయలుదేరాము. అదో సుదీర్ఘ ప్రయాణం. మా రెండో మనుమరాలు సృష్టి కారు తీసుకుని ఎయిర్ పోర్టుకి వచ్చింది. కళ్ళ ముందు పుట్టిన అమ్మాయి అమెరికాలో అలవోకగా ఏనుగులాంటి కారు నడుపుతుంటే కళ్ళకు చూడముచ్చటగా అనిపించింది.

కొడుకే తండ్రిగా మారిన వేళ

'చిట్టి డెలివర్డ్ మేల్ చైల్డ్ - గోపాలరావు '

1973 ఆగస్టు అయిదో తేదీన మద్రాసు నుంచి మా మామగారు ఇచ్చిన టెలిగ్రాం బెజవాడలో వున్న నాకు మరునాడు చేరింది. ఈ టెలిగ్రాంని ఇప్పటికీ భద్రంగా దాచుకున్నాను. అయితే ఆ రోజుల్లో టైపు చేసిన కాగితాలను టెలిగ్రాం పేపరుపై జిగురుతో అతికించేవారు. కాలక్రమంలో పొడిబారి అవి రాలిపోయాయి.

నాడు పుట్టిన నా పెద్ద కొడుకే ఈ సందీప్. సండే నాడు పుట్టాడు కనుక సందీప్ అని పిలవడం మొదలు పెట్టాము. బాలసారలు, నామకరణాలు గట్రా లేవు.

ఇప్పుడు పెరిగి పెద్దవాడై అమెరికాలో ఉద్యోగం చేస్తున్నాడు. వాడి యాభయ్యవ పుట్టిన రోజునాడు నేను కాకతాళీయంగా అమెరికాలో వుండడం తటస్థించింది.

వాడి ఫ్రెండ్స్ ఓ పదిమంది తమ కుటుంబాలతో కలసి పుట్టిన రోజు వేడుకను సియాటిల్ లోని నదిలో నౌకా విహారం చేస్తూ ఘనంగా, సందడిగా నిర్వహించారు. నా కోడలు భావన, మనుమరాళ్ళు సఖి, సృష్ఠి ఈ వేడుకకు తగిన ప్రణాళిక చాలా ముందుగానే సిద్ధం చేశారు.

అందరూ సందీప్ గురించి మాట్లాడమంటే నాకు మాటలు కరువయ్యాయి.

' 2019 లో నా భార్య నిర్మల కన్నుమూసేవరకు వాడికి నేను తండ్రిని. అప్పటినుంచి వాడు నాకు తండ్రిగా మారి కడుపులో పెట్టుకుని చూస్తున్నాడు '

ఇంతకు మించి నా నోరు పెగల్లేదు.

మాట్లాడిన వారందరూ చక్కటి తెలుగులో మాట్లాడి, సందీప్ తో తమ పరిచయాన్ని, స్నేహాన్ని, వాడి మంచితనాన్ని గొప్పగా ప్రశంసించారు.

ఇంటికి వచ్చిన తర్వాత తల్లి ఫోటో ముందు మళ్ళీ కేకు కట్ చేసి దణ్ణం పెట్టి ఆశీస్సులు తీసుకున్నాడు.

ఒకరకంగా వాడు నా కంటే రెండు రోజులు పెద్ద. నా పుట్టిన రోజు ఆగష్టు ఏడు అయితే వాడిది ఆగష్టు అయిదు.

కింది ఫోటోలు:

తాంపా యూనివర్సిటీ దృశ్యాలు, సందీప్ పుట్టినరోజు దృశ్యాలు.