జీవితంలో కొన్ని సంఘటనలు కధలకు ఏమాత్రం తీసిపోవు.
చాలా ఏళ్ళ క్రితం, 2005లో కాబోలు, తానా వారి ఆహ్వానం మేరకు అమెరికా వెళ్లాను.
‘ఎంతకాలం అమెరికాలో వుంటారు’ అనే ఇమ్మిగ్రేషన్ అధికారి ప్రశ్నకు ‘అయిదు రోజులు’ అని జవాబిచ్చాను. ‘ఫైవ్ డేస్ ఓన్లీ’ అన్నాడతగాడు ఒకింత ఆశ్చర్యంతో. నిజానికి నా రిటర్న్ ఫ్లైట్ కూడా ఐదో రోజునే వుంది. తీసి చూపించాను. ఆల్ ది బెస్ట్ అన్నాడు స్టాంప్ వేస్తూ.
బయటకి వచ్చి చూసుకుంటే ఆరు నెలలు అని వుంది. పదేళ్ల మల్టిపుల్ విజిటర్స్ వీసా నాది. అమెరికాలో ఉండడానికి ఎక్కువలో ఎక్కువ అనుమతించే ఆరు మాసాల వ్యవధిని నాకిచ్చినట్టు.
తానా సభలు జరిగే డెట్రాయిట్ నగరంలో విదేశాల నుంచి వచ్చిన అతిధులకు కొన్ని హోటళ్ళలో బస ఏర్పాటు చేశారు. పెద్ద ఆడంబరంగా లేకపోయినా గదిలో అన్ని వసతులు వున్నాయి. ఒక్కో గదిని ఇద్దరిద్దరికి చొప్పున కేటాయించారు. నాతో పాటు గదిలో ఉన్న వ్యక్తి వచ్చినప్పటి నుంచి చాలా టెన్షన్ తో వున్నట్టు కనిపించాడు. మర్నాడు డెట్రాయిట్ మాజీ మేయర్ , కీర్తిశేషులు ఆల్బర్ట్ కోబో పేరిట నిర్మించిన సువిశాల సభామందిరంలో తానా సభలు మొదలవుతాయి.
అతడితో పెద్దగా మాట్లాడానికి నా దగ్గర కూడా విషయాలు లేవు. అంత పరిచయమూ లేదు. అయినా అతడి మొహంలో కనబడుతున్న టెన్షన్ తగ్గించడానికి వివరాలు అడుగుతూ మాటల్లో పెట్టాను.
‘ఎవరికీ చెప్పకండి. నేను ఈ ఒక్క రాత్రే వుంటాను. తెల్లారేసరికల్లా వెళ్ళిపోతాను’ అన్నాడు. నాకు ఆశ్చర్యం. సభలకోసం వచ్చి తెల్లారి వుండననడం ఏమిటి? ఎక్కడికి అని అడిగేలోగా అతడే అన్నాడు.
‘ఎక్కడికి పోవాలో సరిగ్గా నాకే తెలియదు. పలానా చోటుకి వెళ్ళమని హైదరాబాదులో చెప్పారు. అదేమిటో, ఎక్కడో, ఎలా వెళ్ళాలో తెలియదు. కానీ వెళ్లి తీరాలి’ అన్నాడు.
‘సరిపడా డబ్బులు ఉన్నాయా' అని అడిగాను. అడిగితే ఇవ్వడానికి నా దగ్గరా ఎక్కువేమీ లేవు. ఏదో అయిదు రోజులు, అదీ వాళ్ళ ఆతిథ్యంలో, ఖర్చులు ఏముంటాయి అనే అభిప్రాయంతో ఎక్కువ డాలర్లు కూడా తెచ్చుకోలేదు.
‘అక్కరలేదు. నేను ఆ ఏర్పాటుతోనే వచ్చాను. ఓ మూడు నెలలకు సరిపడా డబ్బులు వున్నాయి. తర్వాత నా అదృష్టం’ అన్నాడతను.
మాటల్లో వివరాలు చెప్పాడు. అతడో ఎలిమెంటరీ స్కూలు టీచరు. పెద్ద సంసారం, చిన్న జీతం. ఎన్నాళ్ళిలా అనుకుంటూ వుంటే ఎవరో చెప్పారు, ‘అమెరికా వెళ్ళు, అది అవకాశాల దేశం, ఏదో ఒక పని దొరక్కపోదు అని.
‘ఎలా వెళ్ళడం?’ అంటే ...
‘అది కూడా అతడే చెప్పాడు. ఏదో ఒక విధంగా విజిటర్ వీసా సంపాదించి వెళ్ళు. ఒక్కసారి అమెరికాలో అడుగుపెడితే రోజుకిన్ని డాలర్లు, గంటకిన్ని డాలర్లు చొప్పున ఇచ్చే వాళ్ళు వుంటారు. నీ ఖర్చులకు పోను ఇంటికి డబ్బులు కూడా పంపుకోవచ్చు అని ఉత్సాహ పరిచాడు’
‘ఏమి చేయాలని ఆలోచిస్తున్న నాకు అతడిచ్చిన ఈ సలహా మరేదీ ఆలోచించకుండా చేసింది. అంతే! ఉన్న కొంత పొలం, అమ్మ వద్దంటున్నా వినకుండా అమ్మేసాను. అప్పటినుంచి చేయని ప్రయత్నం లేదు, వీసా సంపాదించడానికి. ఇన్నేళ్ళకు కుదిరింది. ఇంట్లో బయలుదేరిన దగ్గరి నుంచి ఒకటే బెంగ. మళ్ళీ మా ఊరికి తిరిగి వెడతానా! మా వాళ్ళను మళ్ళీ నా కళ్ళతో చూడగలుగుతానా!’
నాకు ఏమి చెప్పాలో తెలియలేదు. మౌనంగా వుండిపోయాను.
అతడే మొదలు పెట్టాడు మళ్ళీ.
‘ఎవరిదో తెలుగు వాళ్లది ఫాం హౌస్ వుందట, దానికి కేర్ టేకర్ కావాలిట. ఎక్కడో అటవీ ప్రాంతంలో వుందట. పలానా చోటు వరకు రాగలిగితే, వాళ్ళే తీసుకు వెడతారట. ఆరు నెలలు స్టాంప్ వేశారు. ఈలోగా ఏదో ఒక మంచి ఉద్యోగం పట్టుకోవాలి’
మనిషిని చూస్తే పిరికివాడిలా వున్నాడు. ఇంత ధైర్యం ఎలా చేశాడు? దేశం కాని దేశంలో, ఊరు కాని వూళ్ళో, భాష కూడా సరిగా లేకుండా ఎలా నెగ్గుకు రాగలడు?
డబ్బు అవసరాలవల్ల, మరీ పచ్చిగా చెప్పాలంటే డబ్బు యావలో పడి జీవితంలో ఇంత రిస్క్ తీసుకోవాలా!
ఆ రాత్రి ఎక్కడో డిన్నర్ ఏర్పాటు చేశారు. అతడు రాలేదు. ఏదో కొనుక్కుని తింటాను రానన్నాడు. వచ్చేసరికి నిద్ర పోతున్నాడు.
తెల్లారి చూస్తే పక్క మీద లేడు, అసలు గదిలోనే లేడు.
ఇంత పెద్ద సువిశాల దేశంలోకి అతడు ఒంటరిగా నడుచుకుంటూ వెడుతున్న దృశ్యమే నా ఊహకు మిగిలింది.
అతడు ఉద్యోగం సంపాదించుకున్నాడా! ఆ దేశంలో స్థిర పడ్డాడా! ఎప్పటికయినా మన దేశానికి వచ్చి భార్యాబిడ్డలను చూడగలిగాడా! అలా జరిగితే ఎంత బాగుంటుందో కదా!
ఆ తర్వాత ఎప్పుడు అమెరికా వెళ్ళినా నా మదిలో ఈ ప్రశ్నలు తలెత్తేవి. కాకపోతే జవాబు దొరకని ప్రశ్నలు.
4 కామెంట్‌లు:
ఆయన ఇప్పుడు అమెరికాలో పెద్ద బిజినెస్ మేగ్నెట్
చాలా మందికి ఉద్యోగ అవకాశాలిస్తున్నారు
పంజాబ్, గుజరాత్ వంటి రాష్ట్రాల నుంచి కూడా అనేక మంది అక్రమ వలసదారులు అమెరికాలో ఉన్నారట. ఈ అక్రమ వలసలు ఖర్చుతో కూడిన ప్రమాదకరమైన వ్యవహారం అని వినికిడి. ఇప్పుడు ట్రంప్ అలాంటి వారిని గుర్తించి స్వదేశాలకు పంపిస్తున్నాడు.
మనదేశం లో అధిక సంఖ్యలో ఉన్న బంగ్లాదేశ్, రోహింగ్యా అక్రమ చొరబాటు దారులను కూడా ఇదే విధంగా గుర్తించి వెనక్కు పంపాలి.
అటువంటివారిని ట్రంప్ స్వదేశానికి పంపించెయ్యడం తప్పుకాదు. కానీ అంత అమానుషంగా విమానంలో తరలించడం మానవత్వం లేని పని. అక్కడ బయలుదేరితే ఇక్కడకు నాన్-స్టాప్ గా వచ్చే ప్రయాణంలో వాళ్ళేమన్నా మధ్యలో విమానం దిగెయ్యగలరా ఏమిటి? వాళ్ళని తీసుకొస్తున్న పోలీసుల మీద దాడి చేస్తారు అనుకోవడానికీ లేదు. వాళ్ళంతా సాయుధ పోలీసులు కదా. మరెందుకు చేతులకు, కాళ్ళకు సంకెళ్ళు వేసి, సరైన ఆహారం కూడా ఇవ్వకుండా (అని కథనాలు) అన్ని గంటలు ప్రయాణం చేయించడం అవసరమా - disproportionate to their offence కదా?
మీరు చెప్పిన మాట నిజమే. మన దేశ పౌరులను అవమానకర రీతిలో సంకెలలు వేసి వెనక్కు పంపడం ఆమోదయోగ్యం కాదు. కొలంబియా దేశం ఈ విషయంలో నిరసన వ్యక్తం చేసి తమ దేశ పౌరులను స్వంత విమానాలలో బంధనాలు లేకుండా వెనక్కు తీసుకు వచ్చింది. ఇదే పద్ధతిలో భారతదేశం ఎందుకు చేయలేదో అర్థం కావడం లేదు. ఈ ఉదంతం భారతీయులను అవమానించినట్లే అవుతుంది.
మన దేశంలో ఉన్న లక్షలు లేదా కోట్ల మంది అక్రమ చొరబాటు దారులను వెనక్కు పంపలేక పోయింది. పైపెచ్చు రోహింగ్యా లకు సౌకర్యాలతో కూడిన ఫ్లాట్స్ కూడా ఏర్పాటు చేసినట్లు వార్తలు వచ్చాయి.మన దేశానికి ఏమైందో అర్థం కావడం లేదు ?
కామెంట్‌ను పోస్ట్ చేయండి