ఏకచక్ర వాహకుడు

సాయంత్రం మా అన్నయ్య, వదిన, వారి కుమారుడు సుభాష్, అతడి భార్య హేమతో కలిసి  కారులో మియాపూర్ వెడుతున్నాం. కారు అప్పుడే జే. యెన్. టీ.యూ.  ఫ్లై వోవర్  ఎక్కుతోంది. ‘బాబాయి చూసావా’ అన్నాడు కారు నడుపుతున్న సుభాష్ రియర్  వ్యూ మిర్రర్ లోకి చూస్తూ. ఏమిటన్నట్టు వాడివైపు చూసాను. ‘స్లో చేస్తాను, నీ విండో నుంచి ఒకసారి బయటకు చూడు’ అన్నాడు.

(ప్రణయ్ఉపాధ్యాయ)

ఒక వ్యక్తి వేగంగా మా కారును దాటి వెళ్ళాడు. మోటారు సైకిలూ కాదు, మోటారు కారూ కాదు. అతడు వెడుతున్న చిన్ని వాహనానికి ఒకే ఒక చక్రం వుంది. దానికి రెండు వైపులా ఉన్న చిన్న పెడల్స్ పై అటొక కాలు, ఇటొక కాలు వేసుకుని నిటారుగా నిలబడి  ప్రయాణం చేస్తున్నాడు. ఆ ఏకచక్ర వాహనానికి హాండిల్  కూడా లేదు. కాళ్ళతో బేలన్స్ చేసుకుంటూ వెడుతున్నాడు.  ఆ సమయంలో వాహనాల రద్దీ  కూడా బాగానే వుంది. చాలాసేపు అంటే ఫ్లై వోవర్ దిగి, మియాపూర్ మెట్రో  మార్గం ముగిసేవరకు మేము అతడినే ఫాలో అయ్యాము. తలకు హెల్మెట్ వుంది. మోకాళ్ళకు, మోచేతులకు మందమైన గ్లౌజ్ లు వేసుకున్నాడు. కాసేపటి తర్వాత అతడ్ని దాటివెళ్ళి, పక్కగా కారు ఆపుకుని  ఆ యువకుడిని చేతిసైగతో ఆగమని కోరాను. అతడూ ఆగాడు. ఎక్కువ టైం లేదు. ఏదో అడిగాను, అతడూ జవాబు చెప్పాడు. అతడి ఫోటో అడిగితే అతడు ముందు నాది అడిగి తీసుకున్నాడు. పేరు చెప్పాడు. ప్రణయ్ఉపాధ్యాయ. వారానికి రెండు రోజులు ఇంటినుంచి ఆఫీసుకు ఇరవై కిలోమీటర్లు మామూలు సైకిల్ మీద వెడతాడు.  రెండేళ్లుగా మిగిలిన రోజుల్లో ఈ ఎలక్ట్రిక్ యూనీ సైకిల్ వాడడం మొదలు పెట్టాడు. మోటారు వాహనాల కారణంగా వాతావరణం కాలుష్య పూరితంగా తయారవుతోందని, ఇలా ఇంధనం లేని వాహనాలు వాడితే కొంతయినా ఆ ప్రమాదాన్ని తగ్గించవచ్చని అన్నాడు. ఇలా ఒకే చక్రం మీద వెడితే ప్రమాదం కాదా అని అడిగితె అతడు గట్టిగా లేదని జవాబు చెప్పాడు.

హడావిడిలో ఫోన్ నెంబరు తీసుకోవడం మరచిపోయాను. ఇంటికి వచ్చి గూగులమ్మను అడిగితె అతడ్ని గురించి మరిన్ని వివరాలు చెప్పింది. ఇంకా కావాలనుకున్నవాళ్ళు అతడి వెబ్ సైట్ చూడవచ్చు.

https://www.meetup.com/Hyderabad-Elec...

ఓపెన్ కాకపోతే : uni electric cycle pranay upadhyaya : ఇలా ట్రై చేయండి

https://www.facebook.com/bhandarusrinivasrao/videos/pcb.2429787387333587/2429787344000258/?type=3&theater