13, ఆగస్టు 2016, శనివారం

ఇక్కడ వుండే పాండురంగడు అక్కడ వున్నాడు


నేను హిందువును. ఆ మాట చెప్పుకోవడానికి గర్వపడతాను. ఎందుకంటే  హిందూ మతం పరమత సహనాన్ని బోధిస్తుంది. ఇతర మతాలను గుర్తిస్తుంది, గౌరవిస్తుంది. ఈ సూత్రం పాటించని మనిషి హిందువు కావచ్చు కానీ  హిందూ మతాన్ని గౌరవించే వ్యక్తి మాత్రం కాదు.
ఫేస్ బుక్  లో అప్పుడప్పుడు కొందరు ఫోటోలు పెడుతుంటారు. పలానా దేశంలో పెద్ద హిందూ దేవాలయం నిర్మించారని. ఆ విషయం తెలుసుకున్నప్పుడు ఒక హిందువుగా సంతోషం వేస్తుంది. మరి అలాగే ఇతర మతస్తులు కూడా  తమ దేవాలయాలను లేదా  ప్రార్ధనా మందిరాలను నిర్మించుకుంటే  వారికీ అలాగే ఆనందం అనిపిస్తుంది. అది సహజం. వారి సంతోషంలో పాలు పంచుకోగలిగితే మరింత సంతోషం.
సమస్య ఎక్కడ వస్తుందంటే మత మార్పిడులను  ప్రోత్సహించినప్పుడు  మాత్రమే. ఇది తగని పని. పార్టీ మార్పిళ్లను సమర్ధించేవారు ఒక మాట చెబుతుంటారు, స్వచ్చందంగా వచ్చి చేరుతున్నారని. ఇదీ అలాంటిదే. నమ్మశక్యం కాని విషయం.
అడవిలో రకరకాల జంతువులు కలిసి సహజీవనం చేస్తుంటాయి. వాటిల్లో కొన్ని మాంసాహారులు, మరికొన్ని శాకాహారులు. అయినా కలిసే వుంటాయి. వేటాడుకుంటూ  కూడా కలిసే వుంటాయి కాని అడవి విడిచి రావు. వాటికీ  తెలుసేమో తమకన్నా ప్రమాదకర జీవులు అరణ్యాల బయట వున్నాయని.
ఒక కుటుంబంలో వున్నవాళ్ళకే ఇష్టాలలో అనేక తేడాలు వున్నప్పుడు  సంఘంలో అవి తప్పవు. ఎవరి ఇష్టాన్ని వారు నిలబెట్టుకుంటూనే పరుల అభిరుచులను గౌరవించినప్పుడే సహజీవనం సాధ్యం.  
ఇందుగలడందులేడను సందేహము కూడదన్న దేవుడు సర్వోపగతుండు.
అన్నిచోట్లా ఉంటాడు, అన్నిట్లో ఉంటాడు.
సందేహము లేదు.  
దేవుడ్ని నమ్మండి, కానీ దేవుడి పేరుతొ గిల్లికజ్జాలు పెట్టుకోకండి.

తాను సృష్టించిన ఈ మనుషులు కాపాడితే కాని తన ఉనికిని కాపాడుకోలేనంత దుర్బలుడు కాదాయన.