నాకు వచ్చిన కల – భండారు శ్రీనివాసరావు

 యాభయ్ ఏళ్ళ క్రితం నేను ఆంధ్రజ్యోతిలో పనిచేసే రోజుల్లో ఆంధ్రజ్యోతి వారపత్రిక (ఇప్పుడు నవ్య అనే పేరుతొ వస్తోంది) ఎడిటర్ పురాణం సుబ్రమణ్య శర్మ గారు పాఠకులు పాల్గొనే ఒక శీర్షిక ప్రారంభించారు. దాని పేరు ‘నాకు వచ్చిన కల’

పుంఖానుపుంఖాలుగా పాఠకుల నుంచి రచనలు వచ్చేవి. ఇంద్రగంటి శ్రీకాంత్ శర్మగారు అస్వస్థత కారణంగా సెలవు పెడితే కొన్నాళ్ళు పురాణం గారికి సహాయకుడిగా పనిచేశాను. అలా ఈ శీర్షికకు వచ్చే రచనలు పరిశీలించే అవకాశం నాకు లభించింది. వీటిలో ఒకటి ఇప్పుడు స్పురణకు వస్తోంది.

ఒకడు కల కంటాడు. తాను ఒక స్నేహితుడికి ఇచ్చిన బాకీని ఆ మిత్రుడు తీర్చేస్తాడు. అయితే అది కలలో.

నిజజీవితంలో ఆ స్నేహితుడు అప్పు తీర్చబోతే అదేమిటి బాకీ ఎప్పుడో చెల్లు అయింది కదా అంటే ఆ స్నేహితుడు తెల్లబోతాడు. బాకీ తీర్చింది కలలో అనే విషయం చివరికి అర్ధం అవుతుంది. అదే తాను స్నేహితుడివద్ద అప్పుచేసి అతడి బాకీ తీర్చినట్టు కలకని, దాని విషయం పూర్తిగా మరచిపోతే ఏమయ్యేదో అని తీరిగ్గా మధన పడతాడు.

ఈ సంగతి గుర్తు రావడానికి ఒక కారణం వుంది.

ఈరోజు ఒక ఛానల్ లో చర్చ చూశాను. అది కేవలం ఊహాగానాల మీద సాగిన చర్చ. అంటే టీవీ వాళ్ళే( ఆ కలలో లాగా) ఒక పరిణామం ఊహించుకుని, అది జరిగిందని నమ్మి చర్చపెట్టారు. సరే! అందులో పాల్గొన్నవాళ్ళు కూడా అది జరిగిందనే నమ్మి యధారీతిగా తమ అభిప్రాయాలను పంచుకున్నారు.

శుభం భూయాత్!

(12-08-2021)