20, మార్చి 2014, గురువారం

సంస్కారం


సంస్కారం అనేది జన్మతః రావాలని అంటారు. కానీ, చూసి నేర్చుకోవడం, నేర్పించడం ద్వారా కూడా సంస్కారం అలవడుతుంది అనడానికి అనేక దృష్టాంతాలు వున్నాయి.
సంస్కారం మన పొరుగున వున్న కన్నడిగుల్లో ఎక్కువేమో అనే అభిప్రాయం కూడా వుంది. కన్నడ సాహిత్యానికి చక్కటి గుర్తింపు తెచ్చిన యు.ఆర్. అనంతమూర్తి ఏకంగా 'సంస్కార' పేరుతొ ఒక నవల రాశారు కూడా.
సంస్కారం గురించిన ముచ్చట పాత్రికేయ మిత్రుడు సత్యమూర్తి దగ్గర వచ్చింది.
వాళ్ళబ్బాయి కన్నడ దేశంలోని ఒకానొక వైద్య కళాశాలలో చదువు పూర్తిచేసుకుని డాక్టర్ పట్టా పుచ్చుకున్నాడు. ఓ జర్నలిస్టు కొడుకు చదువులో ఇలా ఎదిగిరావడమే  అదృష్టం అనుకుంటే సత్యమూర్తి డబల్ ధమాకా కొట్టాడు. వాళ్ల అమ్మాయి కూడా రేపోమాపో డాక్టర్ కాబోతోంది.
అది సరే. సంస్కారం గురించికదా చెప్పుకుంటున్నాం.


(పుత్రోత్సాహము)

కాన్వొకేషన్ కు రమ్మని ఆ వైద్య కళాశాల నుంచి సత్యమూర్తి దంపతులకు ఆహ్వానం అందింది. భార్యను, డాక్టర్ తనయుడినీ, కాబోయే దాక్టరమ్మను  అందర్నీ వెంటబెట్టుకుని 'చిత్ర  దుర్గం' కాబోలు వెళ్లారు. అక్కడి ఏర్పాట్లు వారికి దిగ్భ్రాంతిని కలిగించాయి. పట్టా పుచ్చుకునే పట్టభద్రుల తలిదండ్రులందరికీ ముందు వరసల్లో వాళ్ల పేర్లు రాసి  మరీ సీట్లు రిజర్వ్ చేశారు. పట్టా ప్రదానం సమయంలో పలానా వారి తలితండ్రులని అందరికీ పరిచయం చేశారు. పట్టాలపై కూడా 'పలానా వారి అబ్బాయి' అని తండ్రి పేరుతో బాటు తల్లిపేరు కూడా ముద్రించారు. 'ఈ తలిదండ్రుల కడుపున  పుట్టడం వల్లనే మీరు ఇలా సమాజంలో నలుగురికీ సేవ చేసే భాగ్యం పొందగలిగార'ని పిల్లలకు  చెప్పారు. తలిదండ్రుల గొప్పతనం గురించి తెలియచేసే రెండు షార్ట్ ఫిలిమ్స్ ప్రదర్శించారు.ఇక సంస్కారం అలవాడక ఏం చేస్తుంది చెప్పండి.అందుకే చెప్పింది. సంస్కారం జన్మతః అబ్బుతుంది. అలాగే నేర్పడం ద్వారా అలవడుతుంది.
ఆవిధంగా సత్యమూర్తి దంపతులది 'ట్రిపిల్ ధమాకా!'

6 కామెంట్‌లు:

అజ్ఞాత చెప్పారు...

Akshara satyam.

భండారు శ్రీనివాసరావు చెప్పారు...

@అజ్ఞాత - ధన్యవాదాలు - భండారు శ్రీనివాసరావు

Manjula Praveen చెప్పారు...

అద్భుతం అనాలి, ఎందుకంటే తల్లి, తండ్రి ని "ఒరే, ఒసే" అని లేదా, పేరు పెట్టి, పిలుస్తున్న ఈ జనరేషన్ లొ ఇంటువంటి సంఘటన జరగడం అద్భుతమే. మన తెలుగు సినిమాల లో తల్లి, తండ్రి ని పేరు పెట్టి పిలవడ్డాన్ని fashion గా ప్రచారం చేస్తున్నారు..

భండారు శ్రీనివాసరావు చెప్పారు...

@Manula Praveen - THANKS

అజ్ఞాత చెప్పారు...

మన దగ్గర అలవాటు లేదు కాని, ఉత్తరాదిలో బంధువులు కాకపోయినా, పెద్ద వయసు వాళ్ళని కలిసినపుడు చిన్నవాళ్ళు పెద్దవాళ్ళ కాళ్ళకి తప్పనిసరిగా మొక్కుతారు.

spbhaskar చెప్పారు...

సర్,
మన రాష్త్ర అగ్రికల్ఛర్ యూనివర్సిటి వారి డిగ్రీ సర్టిఫికేట్ లో కూడా, తల్లిదండ్రుల పేర్లు ఉంటాయి,
వాళ్ళను ఆహ్వానింఛడం లాటివి ఉండవు కాకఫోతే.
బాస్కర్