అయాం ఎ బిగ్ జీరో (321) : భండారు శ్రీనివాసరావు

 

నాతో జాగ్రత్త!

టీవీ చర్చలకు ముప్పూటలా వెళ్ళే రోజుల్లో ఒక ఛానల్ యాంఖరమ్మాయి నా మొహాన ఓ కాంప్లిమెంటు పారేసింది.

'మీరిలా ప్రశాంతంగా ఎలా వుంటున్నారు. మా నాన్నగారు ఎప్పుడూ రుసరుసలాడుతూ ఉంటారు.'

పాపం ఆ అమ్మాయికి తెలియదు, నేనూ ఇంట్లో అంతకంటే ఎక్కువ భుగభుగల, బుసబుసల మనిషినని, దూర్వాసుడికి వారసుడిని అని.

ఆ అమ్మాయి పుణ్యమా అని నాకొక విషయం తెలిసొచ్చింది. ప్రతి మనిషిలో ఓ అపరిచితుడు దాగుంటాడని. అందరికీ మంచి మనిషిగా కనిపించే శాల్తీలు నిజానికి అంత నిఖార్సయిన మంచి సరుకు కాకపోవచ్చని. సకల సద్గుణ రాముడని బయటవారు కీర్తించే లక్షణాలు వారిలో ఆట్టే లేకపోవచ్చని.

ఈ రూలు నాకే కాదు మనం అందరం అభిమానించే సినీ తారలు, రాజకీయ నాయకులు, రచయితలు, జర్నలిష్టులకు సైతం వర్తిస్తుంది. వాళ్ళ అందచందాలు, మాటల గారడీలు, రచనలు, రాతలు ఇవన్నీ చూసీ, వినీ, చదివీ పరమవీర అభిమానులం అయిపోతుంటాం. అక్కడే బోల్తాపడిపోతుంటాం. నిజానికి, పైకి కనిపించేవాటికీ, వారికీ ఆమడ దూరం వుంటుందన్న వాస్తవం మరచిపోతుంటాం.

అన్నింటికీ మినహాయింపు వున్నట్టే ఈ సూత్రం నుంచి వేరు చేసి చూడాల్సిన మహానుభావులు లేకపోలేదు.

వారు పుణ్య పురుషులు. మిగిలినవారు కాపురుషులు.

ఎవరో చూస్తున్నారు

ఇదేమీ A Certificate సినిమా టైటిల్ కాదు.

ఈ మాటను రాజకీయ నాయకులు, సినిమా తారలు, రాత్రికి రాత్రే సెలబ్రిటీలుగా మారిపోతున్న వారు అనుక్షణం గుర్తు పెట్టుకోవాల్సిన రోజులు వచ్చాయి. ఏమి చేసినా, ఏమి మాట్లాడినా, ఎవరో చూస్తున్నారు, ఎవరో వింటున్నారు అనే సోయిలో వుండాలి. (గోడలకు చెవులే కాదు ఈ కాలంలో సీసీ కెమెరాలు, టీవీ కెమెరాలు, సెల్ ఫోన్ కెమెరాలు వంటి కళ్ళు కూడా వచ్చి చేరాయి)

లేకపోతే ఎప్పుడో ఒకప్పుడు టీవీ తెరల మీదనో, సోషల్ మీడియాలోనో అవే దృశ్యాలు, అవే సంభాషణలు మీరే చూసుకోవాల్సి వస్తుంది. అప్పుడు కస్సుబుస్సులు వినబడేది మీ ఇంటి వారి నుంచే సుమా!

కాబట్టి, కావున

తస్మాత్ జాగ్రత!

(ఇంకావుంది)