మా రోజుల్లో అని ఎవడైనా సంభాషణ మొదలు పెడితే ఇక ఆ వ్యక్తి ఈనాటి వాడు కాదు, పాత తరం మనిషి అని ఎవరికైనా ఇట్టే అర్ధమై పోతుంది. ఇవతల వ్యక్తి కూడా అదే బాపతు అయితే ఆ ముచ్చట్లకు అంతే వుండదు.
1975లో నేను రేడియోలో చేరిన కొత్తల్లో పరిచయం అయిన కె. వేణుగోపాల్ తో నా స్నేహం ఇప్పటికీ కొనసాగుతోంది. ఈనాడులో రాజకీయాలు రాసిన జర్నలిస్ట్ కాబట్టి సహజంగానే అతడికి వాటి పట్ల ఆసక్తి జాస్తి. రాజకీయులతో పరిచయాలు కూడా ఎక్కువే. వేణుగోపాల్ సలహాలు తీసుకోవడానికి వాళ్ళలో చాలామంది ఫోన్లు చేస్తుండేవాళ్ళు.
ఇక పొతే ఇప్పుడు మేమిద్దరం ముందు చెప్పిన ‘మారోజుల్లో...’ బాపతే. కాబట్టి అప్పుడప్పుడు ఫోన్లో మాట్లాడుకుంటూ ఉంటాము.
‘నిమ్మగడ్డ మీద సభాహక్కుల తీర్మానం ఇచ్చారని అంటున్నార్రు. ఏమైతుందని అనుకుంటున్నావ్’ అన్నాడు కొద్దిసేపటి క్రితం ఫోన్ చేసి.
‘ఏమవుతుందో నాకూ తెలియదు. ఆట ఆడేవాడిని బట్టి ఆట తీరు చెప్పొచ్చు. అలాగే ఒక రాజ్యాంగ వ్యవస్థకు ప్రాతినిధ్యం వహించే వ్యక్తి తీసుకునే నిర్ణయాన్ని బట్టి పరిణామాలు వుంటాయి’
‘........’
‘గతంలో కోర్టు తీర్పుల్ని కూడా లక్ష్య పెట్టని స్పీకర్లని మనం చూశాం. పట్టుదలతో ఆడే ఆట వేరు, పంతాలతో ఆడేది వేరు. ఇప్పుడు ఇరుపక్షాలదీ రెండో బాటే. ఒకరు తప్పు చేస్తున్నారేమో అని మనం అనుమానించేలోగా అవతల వాళ్ళు కూడా మరో తప్పు చేస్తున్నారు. తీర్పు చెప్పే ఛాన్స్ ఎవరిస్తున్నారు?ఎక్కడిస్తున్నారు?’
‘వాళ్ళు మాట్లాడే మాటలు వింటుంటే వీళ్ళు ఒకప్పుడు మనకు తెలిసిన వాళ్ళేనా అనిపిస్తోంది’ అన్నాడు వేణు.
‘నిజమే! ఇప్పుడు టీవీల్లో వస్తున్న వార్తలలో వాడే భాష సంగతేమిటి అని అడుగుతున్నారు జనం. ఒకళ్ళకు చెప్పేముందు మనం కూడా ఒకసారి మనలోకి తొంగి చూసుకోవాలి కదా!’
‘అదీ నిజమే! పక్క పేపరు పేరు కూడా రాసే వాళ్ళం కాదు, ఒక పత్రిక అని తప్ప. ఇప్పుడో! ఒకర్ని మరొకరు కుత్తుకలు నరుక్కోవడం తప్ప అన్నీ చేస్తున్నారు.
‘కాబట్టి, కావున మనం ఇలా అప్పుడప్పుడూ మాట్లాడుకుంటూ గతం తిరగేసుకుంటూ ఉందాం. దాన్ని మించింది లేదు, ఈ వయసులో’
(30-01-2021)
కామెంట్‌లు లేవు:
కామెంట్‌ను పోస్ట్ చేయండి