28, ఏప్రిల్ 2017, శుక్రవారం

ఇదో తుత్తి.....

1975 నుంచి 2017 వరకు. అంటే నలభయ్ మూడేళ్ళు.


గుర్తింపు పొందిన మీడియా సంష్టలలో పనిచేసే జర్నలిష్టులకు ప్రభుత్వ గుర్తింపు కార్డులు (ACCREDITATION CARDS) ఇవ్వడం అనేది 1975 సంవత్సరానికి పూర్వం కూడా అమల్లో వున్న విధానమే.
నేను రేడియోలో చేరింది 1975 నవంబరు  14 వ తేదీన. ఆ ఏడాది జర్నలిస్టులకి  ఇచ్చిన గుర్తింపు కార్డుల  గడువు మరో నెలన్నర రోజుల్లో ముగిసే సమయంలో అన్నమాట. ఆ కొద్ది వ్యవదానానికి ఈ గుర్తింపు కార్డు తెచ్చుకోవడం ఎంత గగనమో ఈ నాటి జర్నలిస్టులకు తెలిసిందే. అయితే  ఆనాడు ఆకాశవాణి ప్రాంతీయ వార్తా విభాగంలో న్యూస్ ఎడిటర్  గా పనిచేస్తున్న పన్యాల రంగనాధ రావు తరహానే వేరు.    
నేను రాసుకున్న ‘రేడియో రోజులు’ అనుభవాల్లో ఆయన్ని గురించి రాసుకున్నది గుర్తు చేసుకోవడం అప్రస్తుతం కాబోదు.
“హైదరాబాద్ లో రేడియోలో చేరిన కొత్తల్లో ఒక రోజు ఉదయం ఆఫీసుకు వెళ్లేసరికి రంగనాధరావు గారు ఏదో పనిచేసుకుంటూ కనిపించారు. ‘ఏం పని మీద వచ్చావ’న్నట్టు నా వైపు చూసారు. నా  మొహంలో రంగులు మారడం చూసి,ఇక్కడ మీకు పనేమిటి? మీరు రిపోర్టర్. బయట తిరిగితే కదా నాలుగు వార్తలు తెలిసేది?  రోజూ సెక్రెటేరియట్ కు వెళ్ళండి. మంత్రులో, అధికారులో  చెప్పేది వినండి. నాలుగు ముక్కలు ముక్కున పెట్టుకు వచ్చి, తెచ్చి నా మొహాన కొట్టండి. అంతే! సింపుల్అని తేల్చేసారు. అలా అంటూనే, “ఇంతకీ ఆఫీసుకు ఎలా వచ్చారు?” అని మరో అర్ధం కాని ప్రశ్న సంధించారు. ఆటోలో వచ్చుంటారు. అవునా! అలా అయితే మీ జీతం డబ్బులన్నీ ఈ రిపోర్టర్ తిరుగుళ్ల కోసం ఆటోలకే తగలెయ్యాల్సి వుంటుంది. వార్తల సంగతి తరవాత. ముందు నేనో ఉత్తరం ఇస్తాను. దాన్ని తీసుకువెళ్ళి సమాచార శాఖలో ఇవ్వండి. అక్కడ అక్రిడేషన్ కార్డు తీసుకుని ఆర్టీసీ ఆఫీసుకు వెళ్ళండి. వాళ్ళు ఇచ్చే బస్ పాసు తీసుకున్న తరవాతే, మిగిలిన ఏ పనులయినా!  తెలిసిందాఅన్నారు. తెలియకపోవడానికి ఏముంది. కానీ ఇలాటి పైఅధికారులు కూడా వుంటారా అన్నదే అంతవరకూ తెలియని విషయం.”
అలా ఒక్క రోజులో తెచ్చుకున్న ‘అక్రిడిటేషన్’ నా విషయంలో ఇన్నేళ్ళుగా కొనసాగుతూనే వస్తోంది. (నేను మాస్కోలో వున్న కాలానికి కూడా) బహుశా నాకంటే సీనియర్లు కొంతమంది ఉండివుండవచ్చేనేమో కానీ  ఒకే ఊరిలో (హైదరాబాదు) ఒకే ఒక సంస్థ తరపున వరసగా అన్నేళ్ళు ఆ ‘గుర్తింపు’ వున్నది నేను ఒక్కడినే అని గట్టిగా చెప్పగలను.
ఈ ఏడాది ఈ కార్డు రావడం కొంచెం ఆలస్యం అయింది. సమాచార కమీషనర్ నవీన్ మిట్టల్  కు ఒక ఎస్సెమ్మెస్ పెట్టాను. వారం తిరక్క ముందే కార్డు చేతికి వచ్చింది. అంతే కాదు, జర్నలిష్టుల హెల్త్  స్కీము అర్హుల జాబితాలో నాకు నేనుగా చేరడానికి వీలుగా “USER NAME, PASSWORD” వెనువెంటనే ఎస్సెమ్మెస్ పంపారు.
తెలంగాణా ప్రభుత్వానికి, సమాచార శాఖ అధికారులకు, తెలంగాణా ప్రెస్ అకాడమీకి, వయోధిక పాత్రికేయ సంఘానికి  నా కృతజ్ఞతలు.
INDEPENDENT JOURNALIST కేటగిరీలో ఇచ్చిన ఈ కార్డు గౌరవాన్ని కాపాడడానికి నేను కష్టపడాల్సి వుంటుంది. పడతాను కూడా.  


2 వ్యాఖ్యలు:

విన్నకోట నరసింహా రావు చెప్పారు...

తప్పకుండా "తుత్తే". గుర్తింపు కార్డ్ లెక్కే వేరు. అభినందనలు.
అవునండీ, కార్డ్ మీద పేర్కొన్న Independent Journalist అనే పేరు కొత్త వాడకమా? Freelance Journalist అనడానికి అలవాటుపడ్డ తరం వాళ్లం కదా, అందుకని అడుగుతున్నాను.

Bhandaru Srinivasrao చెప్పారు...

@విన్నకోట నరసింహారావు: అక్షరాలా కరక్టు.