3, ఆగస్టు 2015, సోమవారం

ప్రత్యేక హోదా - అసలు విషయం



ఎక్కడో ఎప్పుడో విన్నట్టుగా వున్న కొన్ని మాటల్ని మళ్ళీ ఓసారి విందాం.మరోసారి మననం చేసుకుందాం.
'విడిపోతున్న ఆంధ్ర ప్రదేశ్ రాష్ట్రానికి ప్రత్యేక హోదా ఇవ్వాలి'
'అయిదేళ్ళు కాదు పదేళ్లు ఇవ్వాలి'
'ఆంధ్ర ప్రదేశ్ కు ప్రత్యేక హోదా ఇస్తామనే హామీకి కట్టుబడి వున్నాం'
'ఈ విషయంలో మా చిత్తశుద్ధిని శంకించాల్సిన పనిలేదు, ప్రతిపక్షాలు కావాలనే మా మీద బురద చల్లుతున్నాయి'
'ప్రత్యేక హోదా సాధించేవరకు మేము నిద్రపోము'
'ప్రత్యేక హోదా  కోసం మా నాయకుడు అనేక పర్యాయాలు ఢిల్లీ వెళ్ళి ప్రధానమంత్రిని కలిసి మహాజర్లు ఇచ్చివచ్చిన సంగతి ప్రతిపక్షాలు మరిచిపోతున్నాయి'
'మేము అధికారంలోకి రాలేక పోవడం వల్ల గత పార్లమెంటు సాక్షిగా మేము ఇచ్చిన ఈ హామీని నిలబెట్టుకోలేకపోయాము. ఈసారి అధికారంలోకి రాగానే ఆంధ్ర ప్రదేశ్ కు ప్రత్యేక హోదా ఇచ్చి మా మాట నెరవేర్చుకుంటామని మరో హామీ ఇస్తున్నాము'
'ఇచ్చిన హామీని కేంద్రంలోని మోడీ ప్రభుత్వం  నిలబెట్టుకోలేదు, కేంద్రంపై ఒత్తిడి తేవడంలో బీజేపీ మిత్రపక్షం అయిన టీడీపీ ఘోరంగా విఫలం అయ్యింది'
'పద్నాలుగవ ఆర్ధిక సంఘం సిఫారసుల మేరకు ఇప్పుడు ఏ రాష్ట్రానికీ ప్రత్యేక హోదా ఇచ్చే పరిస్తితిలేదు. విభజన చట్టంలోనే ప్రత్యేక హోదాను కాంగ్రెస్ పొందుపరచి వున్నట్టయితే ఇప్పుడీ పరిస్తితి వచ్చేదే కాదు'
'మేము ఇవ్వలేదు సరే. ఇప్పుడు పార్లమెంటులో బిల్లు ఆమోదింపచేయగల మెజారిటీ వుంది. ప్రత్యేక హోదాకు వీలు కల్పిస్తూ చట్ట సవరణ చేయవచ్చు కదా'
'ప్రత్యేక హోదా కుదరదు అన్న కేంద్ర మంత్రి ప్రకటన ఆంధ్ర ప్రదేశ్ కు వర్తించదు'
'ప్రత్యేక హోదా కుదరని పక్షంలో ప్రత్యేక ప్యాకేజీ ఇస్తాం'
'రాజీనామాల వల్ల ప్రత్యేక హోదా వచ్చేటట్టయితే అందుకు మేము సిద్ధం'
ఇవన్నీ ఏడాది కాలంగా వినీ వినీ ప్రజల చెవులకు తుప్పు పట్టింది. అవే మాటలు పదేపదే  వింటూ రావడం వల్ల పట్టిన చెవుల తుప్పు ఒదిలిపోయింది కూడా. అందుకే ప్రజలకు ఇప్పుడు సర్వం అర్ధం అవుతోంది. రాజకీయ పార్టీల అసలు  తత్వం బోధపడుతోంది.
నిజానికి ఈ మాటలు అన్నీ పైకి చెప్పేవి. మనసులోని మాటలు వేరే.
'ఇవ్వచ్చు. కానీ దగ్గర్లో ఎన్నికలు లేవు.  ఇప్పుడు ఇస్తే ఏమిటి లాభం?'
'ఇప్పుడే ఇవ్వాలి. ఎన్నికలకు ముందు ఇస్తే మాకేమిటి లాభం'
'ఇవ్వడం వల్ల మా పార్టీకి ప్రస్తుతం ఎలాటి లాభం లేదు. పైగా నష్టం కూడా. కానీ రాజకీయ ప్రయోజనాలకోసం పోరాడక తప్పదు. రోడ్డెక్కక తప్పదు'

మనసులో మాట అనండి, మన్ కీ బాత్ అనండి. అసలు విషయం ఇది.    

3 వ్యాఖ్యలు:

అజ్ఞాత చెప్పారు...

కాంగీ లేదా బీజేపీ -> దొందూదొందే.

Jai Gottimukkala చెప్పారు...

మీరు "అసలు విషయాలు" రెండు మరిచిపోయారు.

1. బీహార్ రాష్ట్రానికి ప్రత్యెక ప్రతిపత్తి ఇవ్వాలన్నది ఎన్నో ఏళ్లుగా ఉన్న డిమాండే కాక నీతీష్ అమ్ములపొదిలో ప్రముఖాస్త్రం. మారిన బీహార్ రాజకీయ నేపద్యంలో ఏటికి ఎదురీదుతున్న బీజేపీ కష్టాలు కొని తెచ్చుకోలేదు.
2. బీజేపీకి పూర్తీ మెజారిటీ ఉండడంతో చంద్రబాబు కేంద్రంలో చక్రం తిప్పే రోజులు పోయాయి. ఎక్కువ మాట్లాడితే వోటుకు కోట్లు ఉదంతాన్ని సీబీఐకి తరలించి ఇరగదీస్తారనే ప్రమాదం కూడా లేకపోలేదు.

శ్రీకాంత్ చారి చెప్పారు...

విభజనకు ముందు రాజకీయ నాయకులు సరిగ్గా ఇలాంటి దాటవేత మాటలే మాట్లాడుతూ తెలంగాణా ప్రజల ఆకాంక్షలపై నీళ్ళు పోస్తుంటే... అటువైపు వారికి అవి వీనుల విందుగా తోచాయి. అలా కాక విభజన అనివార్యమన్న వాస్తవాన్ని గుర్తించి, కుహనా సమైక్య వాదాన్ని ఎత్తుకోకుండా తమకు కావలసిన దానికోసం నిజాయితీగా పోరాటం చేస్తే ఆయా ఏర్పాట్లు బిల్లులోనే వచ్చి వుండేవేమో!