19, జులై 2011, మంగళవారం

వెర్రి మొహాన్ని చూడాలని వుందా ? – భండారు శ్రీనివాసరావు

వెర్రి మొహాన్ని చూడాలని వుందా ? – భండారు శ్రీనివాసరావు


చూడాలని వుంటే ఈ నాలుగు ప్రశ్నలకు జవాబు చెప్పే ప్రయత్నం చేయండి.

యక్ష ప్రశ్నలు కాదు కాబట్టి ప్రయత్నించి చూస్తేపోయేదేమీ వుండదు.

సమాధానం మాత్రం వెంటనే చెప్పాలి సుమా. ఆలోచిస్తూ పోతే కుదరదు.

ఇదిగో! ఇదే మొదటి ప్రశ్న.

మీరో పరుగు పందెంలో పాల్గొంటున్నారు..

రెండో స్తానంలో వున్న ప్రత్యర్ధిని మీరు దాటిపోయారు.

అప్పుడు పందెంలో మీరే స్తానంలో వున్నట్టు?

అవును! అదే అనుకున్నాను.

మొదటి స్తానం చేరుకున్నట్టు జవాబు చెబుతారని.

అయితే ఆ జవాబు పూర్తిగా తప్పు.

పందెంలో రెండో స్తానంలో వున్న వ్యక్తిని దాటిపోయారంటే అతడి స్తానంలో మీరు చేరినట్టు. అంటే ఈ ప్రశ్నకు సరయిన సమాధానం రెండో స్తానం అన్నమాట.

ఇప్పుడిక రెండో ప్రశ్న

ఈ పరుగు పందెంలో మీరు చిట్టచివరవున్న ప్రత్యర్ధిని దాటారనుకుందాం.

అప్పుడు మీరు ఏ స్తానంలో వున్నట్టు.

దీనికి మీ సమాధానం పందెంలో చివరివాడికంటే ముందున్నట్టు. అవునా!

అయితే మాత్రం మళ్ళీ పప్పులో కాలేసినట్టే.

ఎందుకని మీరు అడగక్కరలేదు. నేను చెప్పక్కరలేదు.

వరుసలో ‘చిట్ట చివరివాడి’ని దాటిపోవడం అన్నది ఎవరికయినా అసాధ్యం కనుక.

పోతే ముచ్చటగా మూడో ప్రశ్న.

కాకపొతే, చాలా చిక్కు ప్రశ్న – నోటితోనే టక్కున జవాబు చెప్పాలి. పెన్నూ కాగితం తీసుకుని లెక్కలు వేసుకుంటూ కూచుంటామంటే కుదరదు.

ముందు వెయ్యి అంకె తీసుకోండి. దానికి నలభయ్ కలపండి. మళ్ళీ మరో వెయ్యి కలపండి.తరవాత ముప్పై, ఇంకో వెయ్యి, ఆ తర్వాత ఇరవై, మరో వెయ్యి, ఇంకో పదీ ఇలా కలుపుతూ పోండి. ఇప్పుడు చెప్పండి. అన్నీ కూడితే ఎంత వచ్చింది?

అయిదువేలా ! కాదు.

ఈ ప్రశ్నకు సరయిన సమాధానం 4100 సుమా! నమ్మకపోతే కాలిక్యులేటర్ తీసుకుని లెక్కవేయండి.


అయ్యో! ఒక్క ప్రశ్నకు జవాబు తట్ట లేదని బాధపడకండి.

ఇంకో ప్రశ్న అలాగే మిగిలుందిగా!

అదే ఇది.

సీగాన పెసూనాంబ (శ్రీ జ్ఞాన ప్రసూనాంబకు ముళ్ళపూడి బుడుగు పెట్టిన ముద్దుపేరు) తండ్రికి అయిదుగురు ఆడపిల్లలు.

అందులో ఒకరి పేరు సుబ్బలక్ష్మి

మరో అమ్మాయి వెంకట లక్ష్మి

ఇంకో అమ్మాయి మహాలక్ష్మి

నాలుగో అమ్మాయి పేరు విజయలక్ష్మి

ఐదో అమ్మాయి పేరేమిటి? ఆదిలక్ష్మి అనుకుంటున్నారా?

కాదు. మన సీగాన పెసూనాంబ.

నాలుగూ అయిపోయాయి. ఏ ఒక్కదానికీ మీ దగ్గర ఆన్సర్ లేదు.

బాధ పడకండి.

ఈ ప్రశ్నలు నన్నడిగినా నేను వేసేది కూడా ఆ వెర్రి మొహమే!



(19-07-2011)

5 కామెంట్‌లు:

అజ్ఞాత చెప్పారు...

పక్కనే మీ ఫొటొ చలా బాగుంది, గురూగారూ!!

రాజేష్ జి చెప్పారు...

:)) Kewl

Rao S Lakkaraju చెప్పారు...

ప్రశ్నలు బాగున్నాయి.

అజ్ఞాత చెప్పారు...

మీ ఫోటో కూడా ఈ పోస్టులో పెడితే సూపరుగుండేది.

lekkala panthulu చెప్పారు...

super guruvu garu..... yaksha prashnalu bagunnai... meere srishtincharaa?