విశాఖ ఉక్కు - రాజీనామా చేస్తే ఏమవుతుంది?

విశాఖ ఉక్కు - రాజీనామా చేస్తే ఏమవుతుంది?

సీఎమ్ జగన్ తన పదవికి రాజీనామా చేయాలి – భండారు శ్రీనివాసరావు

 సీ ఎం రాజీనామా చేస్తేనే , కేంద్రం విశాఖ ఉక్కు విషయంలో మెట్టు దిగివస్తుందని ఓ నాయకుడు అన్నట్టు టీవీల్లో వస్తోంది. మరి ఆ నాయకుడు కూడా పదవిలేని వాడేమీ కాదు. ముందు తన పదవికి రాజీనామా చేసి మరొకరిని చేయమంటే ఒక పద్దతిగా వుండేది. కానీ అలా చేస్తే రాజకీయం ఎలా అవుతుంది.

రాజీనామాల వల్ల ఫలితం ఉండదా అనే ప్రశ్న ఒకటి వుంది. వుంటుంది. కానీ అందుకు దీర్ఘకాలిక పోరాటం అవసరమవుతుంది. పుష్కర కాలం పైగా సాగిన తెలంగాణా పోరాటంలో ఉద్యమ నాయకులు ఎన్నిసార్లు రాజీనామాలు చేసారో, ఎన్ని ఉప ఎన్నికల్లో ప్రజలు తమ అభిలాషను వ్యక్తం చేశారో, ఆ విషయం కేంద్రానికి బోధ పడడానికి ఎంత కాలం పట్టిందో ఆ సంగతులన్నీ ఈనాడు విశాఖ ఉక్కుకోసం రాజీనామాలు డిమాండ్ చేస్తున్న వాళ్ళు గుర్తు పెట్టుకోవాలి. అలా దీర్ఘకాలిక ఉద్యమం చేయగల సత్తా తమకు వుందో లేదో ఒకసారి అంచనా వేసుకోవాలి.

ప్రత్యేక హోదా కోసం ఆనాడు వైసీపీ లోక సభ సభ్యులు మూకుమ్మడిగా రాజీనామాలు చేశారు. అయినా వచ్చిందా! ఇలా రాజీనామా చేయగానే అలా దిగిరావడానికి కేంద్రంలో వున్నది అల్లాటప్పా ప్రభుత్వం కాదు. కొన్ని వాస్తవాలను అవగాహన చేసుకుని ఆచరణాత్మక విధానంతో ముందుకు పోవాలి.

రాష్ట్ర విభజన సమయంలో ఆంధ్ర ప్రాంత నాయకులు జరగబోయే వాస్తవాన్ని గమనించకుండా సమైక్య నినాదంతో ముందుకు వెళ్ళడం వల్ల ఎలాంటి నష్టం జరిగిందో ఆలోచించుకోవాలి.

‘రాష్ట్ర విభజన నిర్ణయం జరిగిపోయింది. మీకేమి కావాలో అడగండి అని నాటి కేంద్ర ప్రభుత్వం అడిగినప్పుడు ఆంధ్ర ప్రాంత నాయకులు చేష్టలు ఉడిగి వుండిపోయారు. ఇప్పుడూ అదే విధంగా ఆలోచిస్తున్నారు.

రాజీనామాల వల్ల ఫలితం ఉంటుందని అనుకుంటే చేయండి. కానీ ఇలా ఒకరికొకరు సవాళ్లు విసురుకుంటూ కాలక్షేపం చేయకండి.

ఎదుటివారి చిత్తశుద్ధిని శంకిస్తూ పదేపదే మాట్లాడే సమస్త రాజకీయ పార్టీల నాయకులు తమతమ పదవులకు ఒక్కుమ్మడిగా రాజీనామా చేయండి. ముఖ్యమంత్రి, మంత్రులు, ఇతర ప్రభుత్వ సంస్థల అధిపతులు, ప్రతిపక్ష నాయకుడు, పార్లమెంటు సభ్యులు, అసెంబ్లీ, శాసన మండలి సభ్యులు తమ అధికార పదవులకు, టీడీపీ, కాంగ్రెస్, బీజేపీ, కమ్యూనిస్ట్ జనసేన పార్టీల నాయకులు తమ పార్టీ పదవులకు ఒకేసారి రాజీనామాలు చేయాలి. శాసన సభ్యులు, శాసన మండలి సభ్యుల రాజీనామాలు అధికారికంగా ఆమోదించిన తర్వాత అసెంబ్లీ స్పీకర్, మండలి చైర్మన్ కూడా రాజీనామా చేయాలి. అప్పుడు రాజకీయ పార్టీల చిత్తశుద్ధి ఏమిటన్నది జనాలకు అర్ధం అవుతుంది. వారి పట్టుదల కేంద్రానికి బోధ పడుతుంది. అలా కాకుండా ఈ ఉద్యమం ద్వారా ఏదైనా రాజకీయ లబ్ది చేకూరితే అది తమ ఖాతాలోనే పడాలి, ఇతరులకు రాకూడదు అనుకుంటే అదో రాజకీయ క్రీడ మాత్రమే అవుతుంది. ఉద్యమం అనిపించుకోదు.

కేంద్రం మెడలు వంచగలం అనే నమ్మకం వుంటే ఆ పని చేయండి. అయ్యేపని కాదు అని మీ మనసు మూలల్లో వుంటే, వాస్తవిక దృక్పథంతో వ్యవహరించి విశాఖ ఉక్కు కర్మాగారం కార్మికుల ఉద్యోగ భద్రత, ఉద్యోగాల్లో రిజర్వేషన్లు, నిరుపయోగంగా వున్న కర్మాగారం భూములు అన్యాక్రాంతం కాకుండా చూడడం, భూములు కోల్పోయిన వారికి సరైన పరిహారం ఇప్పించేలా చూడడం ఇటువంటి అంశాలపై గట్టి హామీ పొందేలా ప్రయత్నం చేయండి. అలా చేసే ముందు ఒక్క గొంతుకతో కేంద్రాన్ని నిలదీయండి ‘ముందు మా విశాఖ ఉక్కు ఎందుకు, దేశంలో మరో దానితో మీ విధానాల అమలు మొదలు పెట్టండని’

ఔషధం చేదుగా వున్నా పనిచేస్తుంది. అలాగే మంచి సలహా కూడా.

రాజకీయాలు పక్కన పెట్టి ఆలోచించండి. మార్గం మీకే కనపడుతుంది.

(10-03-2021)

Senior Journalist Bhandaru Srinivasa Rao Clarity On Vizag Steel Plant | ...

Political snippets

“ఇంతకీ ఏం జరిగింది”

“గతంలో తాను చెప్పిన వీడియో క్లిప్పింగ్ మరోసారి వేసుకోండని చెప్పి ప్రెస్  మీట్  ముగించి చక్కాపోయాడు”

 

"....పీకలేక పోయారు"

(రాయలేక చుక్కలు)

టీవీ చర్చల్లో ఇది 'అనుమతించబడిన' పద ప్రయోగం అయిపోయింది.

చింతించి వగచిన ఏమి ఫలము?

 

'పార్టీ ప్రయోజనాలు ప్రధానంకాదు, రాష్ట్ర ప్రయోజనాలే ముఖ్యం అని నొక్కి చెబుతూవస్తున్నవారికి ఇప్పుడు నిర్ణయం తీసుకోవడం అగ్ని పరీక్ష'

 

 

‘మహిళా దినోత్సవం ఒక్క రోజన్నా ఆడవారిపై వేధింపుల వార్తలు రాకుండా వుంటే బాగుండు’

దురాశ అని తెలిసీ ఆశ పడడం అంటే ఇదే కాబోలు!

 

 

'ఎన్నో ఏళ్ళ పోరాటం తర్వాత రాష్ట్రం ప్రాంతాల వారీగా విడిపోయింది. ఎలాటి పోరాటం అవసరం లేకుండానే ప్రాంతాలు పార్టీల వారీగా విడిపోతున్నాయి.'

 

"ఎన్నికల్లో పోరాటానికి డాలూ, కత్తులూ, మనీ, మద్యం ఈ గోలంతా ఎందుకు? చడీచప్పుడు లేకుండా ప్రత్యర్ధి ఓటు తీయించేస్తే పోలా!"

 

డయల్ చేయగానే

మీకూ నాకూ మధ్య

'కరోనా'

 

అలనాటి రష్యాలో అతివల హవా!

 అక్కడ అన్ని విషయాల్లో పెద్దపీట స్త్రీబాలవృద్ధులదే.

రెండో ప్రపంచ యుద్ధ కాలంలో తుపాకి పట్టగలిగిన ప్రతి ఒక్క మగవాడినీ- వయస్సుతో నిమిత్తం లేకుండా యుద్ధరంగానికి పంపిన కారణంగా - దేశాన్ని నడిపేందుకు మహిళల తోడ్పాటు అవసరమయిందని చెప్పుకుంటారు. ఆ రోజుల్లో రైళ్ళూ బస్సులూ ట్రాములూ నడపడంతోపాటు కర్మాగారాల్లో కూడా స్త్రీలే పనిచేసారు. అందుకు కృతజ్ఞతగా ఆనాటి కమ్యూనిస్ట్ ప్రభుత్వం- ఆడవారికి కొన్ని ప్రత్యేక హక్కులు కల్పించింది. అనేక రాయితీలు, సదుపాయాలూ వారికి సమకూర్చింది. చలి దేశం కాబట్టి చిన్నదో, పెద్దదో ప్రతివారికీ ఒక గూడు అవసరం. కొంపాగోడూ లేనివాళ్ళు మనవద్ద మాదిరిగా ప్లాటు ఫారాలపైనా, ఫుట్ పాతులపైనా రోజులు వెళ్లమార్చడానికి అక్కడ వీలుండదు. ఇళ్ళ కేటాయింపును కుటుంబంలో ఆడవారి పేరు మీద జరిగే పధ్ధతి ప్రవేశపెట్టడంతో కాలక్రమేణా ఇంటి వ్యవహారాలలో పడతుల పట్టు పెరుగుతూ వచ్చింది. అంతే కాకుండా చదువులు ఉద్యోగాలలో మగవారితో పోటీ పడి సంపాదించుకున్న ఆర్ధిక స్వావలంబన వారి స్వేచ్చా జీవితానికి ఆలంబనగా మారింది. ఇంటిమీద హక్కులు, ఆర్దికపరమయిన వెసులుబాటు లభించడంతో ఇళ్ళల్లో వారిదే పైచేయి అయింది. నిండా యిరవయి ఏళ్ళు నిండకుండానే ఇద్దరు ముగ్గురు మొగుళ్ళకు విడాకులు ఇచ్చి నాలుగో పెళ్ళికి సిద్ధం కాగల సత్తా వారి సొంతం అయింది. మాస్కో రేడియోలో పనిచేసే నటాషా చెప్పినట్టు 'పండగనాడుకూడా పాత మొగుడేనా ' అనే వారి సంఖ్య పెరిగింది.

సోవియట్ రష్యాలో ఏటా పెరిగిపోతున్న విడాకుల పట్ల అక్కడో జోకు ప్రచారంలోకి వచ్చింది. విడాకులు ఎవరు ఇచ్చినా, కొత్త ఇల్లు కేటాయించేవరకు పాత పెళ్ళాంతో, ఆమె తాజాగా కట్టుకున్న కొత్త మొగుడితో కలసి పాత పెళ్ళాం పాత ఫ్లాటులో నివసించాల్సిన పరిస్తితి మగవాళ్ళది. ఈ దుస్తితి పగవాళ్ళకి కూడా రాకూడదురా బాబూ! అని సరదాగా చెప్పుకునేవారు. అయితే అక్కడ ' ఏకపతీవ్రతం ' చేస్తున్న ఆడవాళ్ళు కూడా లేకపోలేదు. పిలిపెంకో అనే ఎనభై ఏళ్ళ 'యువకుడితో' మా కుటుంబానికి పరిచయం ఏర్పడింది. ఆయన గారి ఏకైక భార్య గత కొన్ని దశాబ్దాలుగా ఆయనగారితోనే కాపురం చేస్తోంది. ఒకే మొగుడితో కాపురం అన్న సూత్రమే ఆవిడనూ, మా ఆవిడనూ జత కల్పిందని పిలిపెంకో మహాశయులవారి అభిప్రాయం. చివరికి ఈ అనుబంధం ఎంతగా పెనవేసుకుపోయిందంటే మేము ఇండియా తిరిగి వచ్చినతరవాత కూడా ఆ పిలిపెంకో దంపతులు హైదరాబాద్ వచ్చి మా ఇంట్లో వారం రోజులు వుండి వెళ్ళారు. గమ్మత్తేమిటంటే నాకూ, మా ఆవిడకు రష్యన్ తెలియదు. వారిద్దరికీ వాళ్ళ భాష తప్ప మరోటి తెలియదు.అయినా అనుబంధానికి ఇది అడ్డంకే కాలేదు.

 

బొమ్మను చేసి, ప్రాణము పోసీ....భండారు శ్రీనివాసరావు

 

(మహిళాదినోత్సవాన్ని పురస్కరించుకుని)

 

బ్రహ్మగారు సత్యలోకంలో బాసింపట్టు వేసుకుని, రేడియో వింటూ చేసే వంట లాగా, అర్ధాంగి వీణావాణి చెబుతున్నవిదంగా సృష్టి కార్యం పూర్తి చేస్తున్నారు.

'అందం అరవై దోసిళ్ళు' అన్నది సరస్వతి.

అక్షరాలా అరవై దోసిళ్ళు అందం కొలిచి పోశాడు విధాత.

'సౌకుమార్యం పాతిక గుప్పిళ్ళు' అన్నది సరస్వతమ్మ.

'తధాస్తు' అన్నాడు బ్రహ్మలుంగారు.

'అమ్మతనం అరవై, ఆత్మబలం ఆరు, అహంకారం మరో ఆరు. వినయం అయిదు, అణకువ ఆరు, మేధస్సు ముప్పాతిక గుప్పిళ్ళు, మానసిక బలహీనతలు మరో ముప్పాతిక, శారీరకబలం కూరలో లవణం మాదిరిగా తగినంత.' చెప్పుకుంటూ పోతోంది చదువుల తల్లి. విధాత వింటూ మరో చేత్తో ఆ బొమ్మకు మెరుగులు దిద్దుతున్నాడు.

బొమ్మ పూర్తయింది. దాని అందం చందం చూసి హాటకగర్భురాణికే మతిపోయింది. ఇంత సౌందర్యం, ఇన్ని తెలివితేటలు, అమ్మో ఇంకేమైనా వుందా అని గాభరా పడిపోయింది.

భార్య కంగారు చూసి బ్రహ్మ తన బోసి నోళ్ళతో ముసి ముసి నవ్వులు నవ్వాడు. నవ్వి చెప్పాడు.

"నువ్వు పాళ్ళు చెబుతున్నప్పుడే అనుమానం వచ్చింది. కొన్ని శృతిమించుతున్నాయేమో అనికూడా అనిపించింది. అదీ మంచిదేలే, సరే పోనీలే అనుకున్నాను. “ఎందుకంటావా? శారీరక బలం వంటలో లవణం మాదిరిగా తగినంత అన్నావు. దానికి ఇన్ని పాళ్ళు అని చెప్పలేదు. ఉజ్జాయింపుగా కొలిచివేసేటప్పుడు కొంత తభావతు తధ్యం. ఇక మానసిక బలహీనతలు ఏకంగా ఎక్కువే పెట్టావు. పాళ్ళు ఎక్కువైనా కష్టమే అన్న సూత్రం నువ్వు పట్టించుకోలేదు. వంటకం పూర్తయింది. ఇక రుచి అంటావా. వేసే దినుసుల పాళ్ళని బట్టి వుంటుంది. అలాగే, ఈ బొమ్మ బతుకూ అంతే. తెలివితేటలు, బలాబలాలు, మేధస్సు యేది తీసుకున్నా ఎవరికీ తీసిపోని మాట నిజమే. కానీ పాళ్ళలోనే తేడా. అందువల్లే ఈ విషయాల్లో ఒక స్త్రీకి మరో స్త్రీకీ ఎంతో తేడా. దండలో దారంలాగా అమ్మతనం ఒక్కటే ఆడవారందరికీ ఉమ్మడి ఆభరణం. అదొక్కటే ప్రపంచానికి కూడా పెద్దదిక్కు, ఆ గౌరవంతోనే సరిపుచ్చుకుని మిగిలిన అన్నింటినీ తేలిగ్గా మరచిపోతుంది. ఈ పుత్తడి బొమ్మకు నేనిస్తున్న అదనపు వరం ఇదొక్కటే!'

 

(March, 8)

 

ఏమి సేతురా లింగా - భండారు శ్రీనివాసరావు

 పూర్వం కమ్యూనిస్టుల ఏలుబడిలో సోవియట్ యూనియన్ వర్ధిల్లిన కాలంలో రేడియో మాస్కోలో దాదాపు ఎనభైకి పైగా ప్రపంచభాషల్లో వార్తాప్రసారాలు జరిగేవి. నేను తెలుగు విభాగం బాధ్యుడిగా ఉండేవాడిని. అప్పుడు సోవియట్ అధినేత మిహాయిల్ సెర్గేవిచ్ గోర్భచేవ్.

ఇన్ని ప్రపంచ  భాషలకు సంబంధించిన వార్తలను ముందు ఇంగ్లీష్ భాషలో తయారు చేసి వాటి  ప్రతులను అన్ని విభాగాలకు పంపేవారు. వాటిని ఆయా భాషల నిపుణులు తమ భాషలలోకి అనువదించి ప్రసారం చేసేవాళ్ళు. నాకు సహాయకుడిగా కొంచెం కొంచెం తెలుగు  తెలిసిన   గీర్మన్ అనే రష్యన్ ఉండేవాడు.

‘మీరు అసలు ప్రతి ఇస్తున్నారు సరే. మీ వార్తల్ని మీరు అనుకున్నట్టు యధాతధంగా అనువదిస్తున్నామా లేదా అనే సంగతి మీకెలా తెలుస్తుంది’ అని అడిగాను. దానికి ఆయన చెప్పిన సమాధానం నన్ను ఆశ్చర్యపరిచింది.

‘ప్రతి వార్తలో దాదాపు మా నాయకుడి పేరు అనేకసార్లు  వస్తుంది. మీరు ఎన్నిసార్లు  ప్రెసిడెంట్ మిహయిల్ సెర్గేవిచ్ గోర్భచేవ్ అంటారో దాన్ని మా వాళ్ళు విని, మా దగ్గర వున్న ఒరిజినల్ బులెటిన్లో ఆ పేరు ఎన్ని సార్లు వచ్చిందో సరిచూసుకుని అప్పుడు మీరు  సరిగా అనువాదం చేస్తున్నారో లేదో మావాళ్ళు కనుక్కుంటారు’ అని కర్ణుడి జన్మ రహస్యం నా చెవిన వేశాడు.

అంటే ఇక ఎటువంటి పరిస్తితిలోనూ సర్వనామాలు పనికిరావు అనేది బోధపడింది.

అందుకా, ‘ప్రెసిడెంట్ మిహయిల్ సెర్గేవిచ్ గోర్భచేవ్ ప్రకటించారు, ప్రెసిడెంట్ మిహయిల్ సెర్గేవిచ్ గోర్భచేవ్ ఇంకా ఇలా అన్నారు, ప్రెసిడెంట్ మిహయిల్ సెర్గేవిచ్ గోర్భచేవ్ పేర్కొన్నారు, ప్రెసిడెంట్ మిహయిల్ సెర్గేవిచ్ గోర్భచేవ్ ఉద్ఘాటించారు’ అంటూ ఒకే పేరాలో నాచేత అష్టోత్తరం చదివిస్తున్నారు అనే వాస్తవం ఎరుకలోకి వచ్చింది.

సరే! ఆ శకం ముగిసింది.

ఇలాంటిదే మరో విశేషం నా కంట పడింది.

ఆఫ్రికా దేశం అయిన ఉగాండాను ఇదీ అమీన్ అనే నియంత పాలించేవాడు. రేడియో కంపాలాలో ప్రతి రోజు అయన గురించిన వార్తలే ప్రముఖంగా ప్రసారం అయ్యేవి. ఆయనకు రేడియోలో తన పూర్తి పేరు చెప్పాలని మక్కువ. నియంత తలచుకుంటే కానిదేముంది. కాకపోతే ఒక ఇబ్బంది ఎదురయింది. పూర్తి పేరు అయితే పరవాలేదు కానీ తనకున్న బిరుదులు, మెడల్స్ కూడా జోడించి చెప్పాలని ఆదేశం. నియంత పాలించే ఆదేశంలో ఆయన ఆదేశం శిరోధార్యమాయే. దాంతో  ఒకటికి పదిసార్లు రేడియోలో ఆయన పేరు వచ్చేది. ఒకటికి పదిసార్లు జనం దాన్ని వినాల్సివచ్చేది. ఎలా అంటే ఇలా:

“His Excellency the President of the Republic of Uganda, General al Haji Idi Amin Dada, VC, DSO, MC……”