ఎర్ర సముద్రం ఎండిపోయింది.- అరుణ్ సాగర్ ఇక లేరు

(మిత్రులు శ్రీ అరుణ్ సాగర్ అకాల మృతిపై ఈ ఉదయం టీవీ – 5 తో,  ఫోన్ ఇన్ లో పంచుకున్న భావవీచిక)

“అరుణ్ సాగర్ ఇక లేరు అనే దుర్వార్తతో ఈ రోజు తెల్లవారింది.

“మనిషి అనేవాడు ఒక లోకంలో జీవిస్తాడు. అదేమిటో అరుణ్ చిన్న వయస్సులోనే అనేక లోకాల్లో సంచరించి అంతలోనే హడావిడిగా కనుమరుగై పోయాడు. అతడిది ఒక లోకం కాదు, పత్రికాలోకం, కవితాలోకం, రచయితల లోకం  ఇలా అన్నిట్లో తన ముద్ర స్పష్టంగా పడేసుకుని తన దోవన తాను నిశ్శబ్దంగా నిష్క్రమించాడు.

“నిన్న కనిపించిన మనిషి ఈరోజు కనిపించకపోవడం సహజం. కానీ ఇక ఎప్పుడూ కనిపించడు అనే భావనే అతి  దుర్భరం.

“ఈ మధ్యనే టీవీ -  5  నిర్వహించిన ఒక పెద్ద చర్చాకార్యక్రమంలో ఆయన్ని కలిసాను. కొద్ది రోజుల్లో జరగబోయేది తెలిసినా ఏమీ తెలియనట్టు హాయిగా నవ్వుతూ మాట్లాడాడు. ఆయన రాసిన ‘మ్యూజిక్ డైస్’ పుస్తకాన్ని సంతకం చేసి మరీ కానుకగా ఇచ్చాడు. ఇచ్చిన పుస్తకం ఎదురుగా వుంది. ఇచ్చిన  అరుణ్ సాగర్ లేడు. మరణం ఇంత దుస్తరంగా మనుషుల్ని విడదీస్తుంది కాబోలు.

“బాగా మాట్లాడగలం అనే పేరున్నవాళ్ళు  కూడా నోరు తెరిచి నాలుగు మాటలు చెప్పలేని సందర్భం ఇది.

“మనుషుల్ని తప్ప  ఆత్మల్ని నమ్మని అరుణ్  సాగర్ ఆత్మకు శాంతి చేకూరాలని కోరుకోవడం విడ్డూరంగానే వుంటుంది. అయినా తప్పని సందర్భం.’ 

(ఒక కార్యక్రమంలో అరుణ్ సాగర్, నేనూ)

(మ్యూజిక్ డైస్ పుస్తకంపై అరుణ్  సాగర్  ఆటోగ్రాఫ్)